Spurning:
Sælir ágætu ráðgjafar. Þar sem nú er lokið hlaupinu um Laugaveginn er ekki annað en að fara að hugsa um næsta hlaup. Þó að ár sé til stefnu vill ég byrja sem fyrst á að undirbúa mig, ég er staðráðinn í að fara næsta sumar, í fyrsta skiptið. Það sem ég vill gera er að byrja í stöð um miðjan september og æfa þar fram í febrúar - mars ásamt einhverju skokki og fara síðan á fullt í hlaupin á útmánuðum.

Það sem mig langar að fá ráð um er, hvað á að leggja mesta áherslu á í stöðinni, hvaða vöðva og æfingar, þungar æfingar eða léttar. Hvaða æfingar byggja best upp líkamlegt þol. Þegar hlaupin byrja af alvöru á ný, á ég fljótlega að fara að hlaupa miklar vegalengdir, brekkur og fjallgöngur. Er líka ekki etv. rétt að skipta æfingum í stöð í uppbyggingu og síðan í æfingar sem styrkja úthaldið enn frekar.

Fyrirfram þakkir og bestu kveðjur.

Svar:
Ég myndi ekki sleppa alveg löngum útihlaupum eða göngum yfir þessa vetrarmánuði. Við getum ekki annað en gefið almennar leiðbeiningar á þessum vettvangi í sambandi við æfingaáætlanir. Númer eitt er að byrja á mjög almennri uppbyggingu þar sem þú tekur alla helstu vöðvahópa fyrir. Leggja síðan meiri áherslu á vöðva sem liggja að hné. Framstig eða aðrar æfingar til að styrkja framanverða lærvöðva eru mjög mikilvægar fyrir þá sem ætla í utanvegahlaupin.

Síðan gæti komið mjög vel út að taka 8 - 12 vikur (t.d. jan - miður mars) þar sem þú leggur áherslu á litlar þyngdir en margar endurtekningar, eins konar þrekhring. Velja æfingar fyrir, fætur (2 til 3), kvið, bak, og efri búk. Þegar þú byrjar á uppbyggingunni í hlaupunum er rétt að ein æfing í viku sé aukin úr t.d. 60 mín upp í 2 - 3 klst. Reyna að ná fjórum til sex 2-3 klst. æfingum. Svo langt ferð þú kannski á þriggja vikna fresti þegar þú ert búinn að byggja þig upp í þá vegalengd, hinar vikurnar er ágætt að miða við 90 - 120 mín.

Ég tel að önnur æfing í vikunni, sú næst lengsta þurfi að ná 60 - 70 mín. Aðra hverja viku er síðan ágætt að fara í brekkur, fjallgöngur.

Kveðja, Gunnar Páll.