Utanvegahlaupanámskeið hlaup.is og Sigga P.

Utanvegahlaupanámskeið hlaup.is og Sigga P.

Hlaup.is og Siggi P. bjóða upp á 4-8 mánaða undirbúningsnámskeið í utanvegahlaupum í fjórtánda skiptið. Námskeiðið hentar fólki á öllum aldri og af mismunandi getustigum og munu allir þátttakendur fá æfingaáætlun 4-5 vikur í senn sem mun taka mið af getu og markmiðum hvers og eins.

Hefst: 12. desember 2021


Lýkur 31. ágúst 2022

Hlaup.is og Siggi P. bjóða upp á 4-8 mánaða undirbúningsnámskeið í utanvegahlaupum í fjórtánda skiptið. Einkum er horft til þeirra sem stefna að þátttöku í stóru utanvegahlaupunum eins og Hengill Ultra og Mt. Esja Ultra í júní, Þorvaldsdalsskokkinu og Reykjanes Volcano Ultra í byrjun júlí, Laugavegshlaupinu um miðjan júlí, Súlur Vertical og Fjögurra Skóga hlaupinu í lok júlí og Tindahlaupinu og North Ultra í lok ágúst. Námskeiðið hentar líka fyrir þá sem ætla að taka þátt í öðrum en ofangreindum hlaupum.

Þátttakendur á námskeiðinu geta valið um lengd þjálfunar en lágmarkstími undirbúnings er 4 mánaða grunnþjálfun. Að auki verður boðið upp á viðbótarþjálfun á tímabilinu desember til mars og geta þátttakendur valið um hvenær þeir byrja. Viðbótarþjálfunin hefst um miðjan desember n.k. og verður samæfing innanhúss í FH-höllinni í Kaplakrika einu sinni í viku á sunnudögum fyrstu 2-3 mánuðina. Í viðbótarþjálfuninni verður áhersla lögð á liðleika- og styrktaræfingar svo og hraðaúthaldsþjálfun þannig að þegar kemur að grunnþjálfuninni þá verði hlauparar vel í stakk búnir til að takast á við æfingaálagið sem því fylgir. Á tímabilinu miður febrúar til miður mars munu samæfingarnar færast út úr húsi og frá og með mars verða æfingar eingöngu úti.

Námskeiðið hentar fólki á öllum aldri og af mismunandi getustigum og munu allir þátttakendur fá æfingaáætlun 4-5 vikur í senn sem mun taka mið af getu og markmiðum hvers og eins.

Kynningarfundur verður haldinn miðvikudaginn 1. des kl. 20:00 í fyrirlestrarsal á 3. hæð í húsi ÍSÍ í Laugardalnum (Íþrótta- og Ólympíusamband Íslands íþróttamiðstöðinni Laugardal, sjá staðsetningu á ja.is) ef sóttvarnarreglur leyfa, annars verður fjarfundur á Teams eða Zoom.

Skráning á námskeið fyrir þátttöku utanvegahlaupum 2022.

Í grunnþjálfunarundirbúningi felst eftirfarandi:

  • Persónuleg áætlun allan tímann, en til 4-5 vikna í senn, sem tekur mið af markmiðum, fyrri hlaupareynslu, meiðslum, núverandi stöðu og fleiru.
  • Farið verður sérstaklega í styrktaræfingar sem nýtast fyrir utanvegahlaup.
  • Fram til febrúar/mars verður ein samæfing á sunnudögum í FH-höllinni í Kaplakrika. Eftir það verður ein úti samæfing í miðri viku á miðvikudögum. Útiæfingar fara fram í Laugardalnum fram í miðjan apríl en eftir það til skiptis í Laugardal og Heiðmörk ásamt fleiri stöðum.
  • Farið verður í nokkrar sameiginlegar fjallaæfingar (Esjan, Hengillinn, Reykjadalur, Helgafell ofl.).
  • Fyrirlestur þar sem farið verður yfir alla þætti í undirbúningi, æfingarnar, útbúnað og fleira.
  • Afsláttur af ýmsum hlaupavörum.
  • Aðgangur að þjálfurunum allan tímann í tölvupósti og/eða í síma.
  • Farið yfir ýmsa þjálffræðilega þætti og frekari undirbúning á æfingum.
  • 50% afsláttur af hlaupanámskeiðum hlaup.is
  • Undirbúningsfundur þar sem farið verður yfir lokaundirbúning fyrir hlaupið.

Gjald fyrir grunnþjálfun í 4 mánuði fyrir hlaup er 38.900 kr. og hefst 4 mánuðum áður en viðkomandi hlaup verður. Hægt er að bæta við allt að fjórum mánuðum í viðbótarþjálfun við grunnþjálfunina og kostar hver mánuður í viðbótarþjálfun 9.500 kr. Viðbótarþjálfunin hefst sunnudaginn 12. desember. Hægt er að velja eingöngu grunnþjálfun en þátttakendum er frjálst að velja lengd viðbótarþjálfunar og geta komið inn hvenær sem þeir vilja.

Skráningargjald og skráning í hlaupin er ekki innifalið í verðinu fyrir námskeiðið. Hlauparar þurfa sjálfir að skrá sig í hlaupin og greiða skráningargjaldið í þau sérstaklega. Vinsamlegast greiðið 10.000 kr staðfestingargjald þegar þið skráið ykkur á námskeiðið, inn á reikning 528-26-4199, kt. 250959-4199. Þátttakendur á landsbyggðinni, sem ekki eiga möguleika á að sækja sameiginlegar æfingar, fá 20% afslátt.

Vinsamlegast hafið samband við Torfa H. Leifsson, torfi@hlaup.is, sími 845-1600 eða Sigurð P. Sigmundsson, siggip@hlaup.is, sími 864-6766, ef þið hafið spurningar. Skráið ykkur með því að smella á eftirfarandi tengil:

Skráning á námskeið fyrir þátttöku utanvegahlaupum 2022.

Ummæli nokkurra þeirra sem hafa sótt Laugavegsnámskeiðið í gegnum árin:

Í byrjun árs 2016 var öll fjölskyldan skráð á Laugavegsnámskeiðið hjá Sigga P. og Torfa. Eiginmaðurinn og dóttirin höfðu áður hlaupið Laugaveginn, en fullkomna skyldi gjörninginn með því að koma mömmu gömlu með. Skeptísk og tortryggin mætti ég á æfingu og átti von á því að vera hætt innan viku. Ég hætti þó fljótlega við það þegar ég áttaði mig á því að hver og einn fékk einstaklingsmiðaða æfingaáætlun, sem hentaði þörfum hvers og eins. Það kom sér vel fyrir mig, enda ekki hlaupið að gagni í mörg ár. Árangurinn skilaði sér heldur betur, en undirrituð komst alla leið innan tímamarka og eiginmaðurinn og dóttirin bættu sig verulega frá fyrri tímum.

Hlaupanámskeiðið hentar hlaupurum af mismunandi getu og vel er fylgst með hvernig gengur. Markmið einstaklinga verða alltaf misjöfn og þeir félagar hafa einstakt lag á að láta missprettharða einstaklinga hlaupa saman á æfingu. Að hlaupa Laugaveginn er háleitt markmið, en algjörlega yfirstíganlegt með réttri leiðsögn. Sjálf hefði ég aldrei lagt af stað, nema undir handleiðslu Sigga og Torfa. Svei mér þá, ef ég fer ekki bara aftur í ár!

Kristín Heimisdóttir (Bjarni Elvar Pjetursson, Gréta Rut Bjarnadóttir), Laugavegshlaupið 2016

"Ég hef tvisvar hlaupið Laugaveginn og undirbjó mig í bæði skiptin með því að fara á Laugavegsnámskeið hjá Sigurði og Torfa.

Námskeiðið er mjög vel útfært og frábært að fá æfingaáætlun sem sniðin er að þörfum hvers og eins. Félagsskapurinn og andlegi stuðningurinn á undirbúningstímanum var mjög góður og gerði það að verkum að árangurinn í hlaupinu og upplifunin var enn ánægjulegri en ella.  Einnig var frábært að fá tímasetta áætlunin fyrir hlaupið sjálft.  Ég mun fara á námskeiðið í þriðja sinn í ár til að undirbúa mig fyrir Laugaveginn."

Hinrik Pálsson, Laugavegur 2013 og 2014.

"Ég skráði mig á Laugavegsnámskeiðið 2013 hjá Sigga og Torfa því mig langaði að undirbúa mig vel, líkamlega og andlega, fyrir fyrsta Laugavegshlaupið mitt. Námskeiðið reyndist framar öllum vonum, ég fékk einstaklings prógramm, samæfingar, frábæra leiðsögn og síðast en ekki síst frábæran félgasskap. Í hópnum voru einstaklingar með mismunandi markmið og væntingar en allir gátu samt sem áður fundið einhvern til að vera "samferða" á æfingum og í keppnum. Mér líkaði námskeiðið svo vel að ég skráði mig aftur 2014 og dró þá manninn minn með og við urðum ekki fyrir vonbrigðum. Við ætlum að bæði að skrá okkur aftur 2015 :)

Hafdís Guðrún Hilmarsdóttir, Laugavegur 2013 og 2014