Siggi P. á toppnum í fantaformi fyrir 25 árum eða svo.Upphitun fyrir Reykjavíkurmaraþonið heldur áfram hér á hlaup.is. Sigurður P. Sigmundsson hlaupaþjálfari og fyrrum Íslandsmethafi í maraþonhlaupi ætlar að gefa maraþonhlaupurum góð ráð fyrir laugardaginn.Það er óhætt að segja að Siggi P. eins og hann er oftast kallaður sé einn besti hlaupari Íslandssögunnar enda stóð Íslandsmet hans í maraþoni í heil 26 ár.Hversu mikilvægur er andlegi þátturinn bæði í aðdraganda maraþonhlaups og meðan á því stendur? Andlegi þátturinn skiptir miklu máli. Mikilvægt að einbeita sér vel að verkefninu og vera vel undirbúinn til að takast á við hugsanleg vandamál sem upp kunna að koma í hlaupinu.Hver eru einkenni hlaupaleiðarinnar í Reykjavíkurmaraþoninu? Eru einhverjir þættir eða kaflar sem ber að varast? Hlaupaleiðin er mjög opin í samanburði við mörg maraþonhlaup erlendis og því lítið skjól að fá ef vind hreyfir. Þar sem sjaldnast er logn í Reykjavík getur kaflinn frá Gróttu reynst maraþonhlaupurum erfiður ef um mótvind er að ræða. Hlauparar verða því að eiga eitthvað inni til að takast á við þann kafla ef svo ber undir. Hlaupaleiðin í hálfmaraþoninu er hins vegar nokkuð hagstæð og lítil hæðarhækkun. Finnst þó að hlaupaleiðin hafi verið skemmtilegri þegar hún var í hring.
Hvernig myndir þú leggja upp síðustu þrjá dagana fyrir Reykjavíkurmaraþon ef þú værir að fara hlaupa maraþon?
Síðustu dagana fyrir maraþon er mikilvægt að hvílast vel og passa jafnframt vel upp á mataræðið. Mín skoðun hefur alltaf verið sú að best sé að byggja upp kolvetnisforðann með neyslu matar. Margir hafa farið flatt á því að taka inn of mikið af kolvetninsríkum drykkjum síðustu dagana. Þá er mikilvægt að gera keppnisáætlun þ.e. hafa millitímana á hreinu og hvar eigi að taka inn drykki og gel.
Að lokum, skilaboð til maraþonhlaupara í komandi Reykjavíkurmaraþoni?
Mikilvægt að halda ró sinni. Forðast að lenda í stressi því það sóar orkunni. Því er gott að skrifa upp tossalista fyrir hlaupið og fara vel yfir hann kvöldið áður svo ekkert atriði gleymist. Þá kemur maður á marklínuna fullur sjálfsöryggis.
Sjá einnig: Upphitun fyrir Reykjavíkurmaraþonið: Hollráð Mörthu fyrir hálfmaraþonið