Laugardaginn 15. júní verður gleðihlaupið Þrístrendingur haldið í 9. sinn. Hlaupið verður af hjartans lyst frá Kleifum í Gilsfirði norður (eða austur) Krossárdal að bænum Gröf í Bitrufirði, þaðan yfir Bitruháls yfir í botn Kollafjaðar og loks suður Steinadalsheiði aftur að Kleifum.

Tímasetning
Laugardagur 15. júní 2019, kl. 10:30 (fyrir þá sem telja sig hægfara) en kl. 11:00 (fyrir þá sem telja sig ekki hægfara).

Staðsetning
Kleifar í Gilsfirði (upphaf og endir).

Vegalengd
Fyrsti leggur eru u.þ.b. 11 km, annar leggur 10 km og sá þriðji um 20 km. Samtals er vegalengdin því tæpt maraþon. Hægt er að hlaupa einn, tvo eða þrjá leggi af leiðinni eftir því hvað fólk er með mikla hlaupaþrá í leggjunum. Hlaupið er sérstaklega tímasett til að það nýtist sem lengsta æfing fyrir þá sem eru að fara Laugaveginn í sumar.

Undirlag
Fyrsti áfangi (Krossárdalur): Vegur, slóðar, vegleysur.
Annar áfangi (Bitruháls): Hestagata.
Þriðji áfangi (Steinadalsheiði): Bílfær vegur.

Leiðin er öll greiðfær fyrir gangandi fólk og hefur verið farin á fjallahjólum.

Aðstandendur 
Aðstandendur hlaupsins eru allir þeir sem taka þátt í því, en þó aðallega frændurnir Dofri Hermannsson frá Kleifum í Gilsfirði og Stefán Gíslason frá Gröf í Bitrufirði. Leiðin liggur einmitt um æskuslóðir þessara frænda.

Tímataka
Tímataka fer fram með dagatali frekar en klukku, drykkjarstöðvar eru í hverjum læk og þátttökugjöld eru engin en mikilvægt að láta vita af mætingu á Facebooksíðu hlaupsins.

Hvað er Þrístrendingur?
Þrístrendingur er ekki spretthlaup, heldur liðhlaup þar sem allir eru í sama liði. Af og til er numið staðar, tekið upp nesti (ef eitthvert er), sagðar sögur af fólki, steinum og stöðum, teknar myndir og alls konar. Nánari upplýsingar um hlaupið má lesa á milli línanna í Þrístrendingsbloggum fyrri ára, t.d. á https://stefangisla.com/2016/06/30/thrjar-strendur-fjorir-menn/.

Verið hjartanlega velkomin!

Nánari upplýsingar
Stefán Gíslason (stefan@environice.is , sími 862 0538).