Hlaupaparið Elín Edda Sigurðardóttir og Vilhjálmur Þór Svansson hleyptu nýlega af stað hlaðvarpsþættinum (podcast) „Hlaupalíf." Hugmyndin er að fjalla um hlaup frá ýmsum hliðum; t.d. æfingar, markmið, næringu, keppnishlaup, almenningshlaup svo eitthvað sé nefnt.
Elín Edda er ein albesta hlaupakona landsins um þessar mundir og á annan besta tíma íslenskrar konu í bæði heilu og hálfu maraþoni. Vilhjálmur er einnig mjög öflugur hlaupari og hefur reglulega verið ofarlega í sterkum almenningshlaupum í íslenska hlaupasamfélaginu undanfarin ár.
Frábærar viðtökur
„Viðtökurnar fóru langt fram úr okkar væntingum. Við fórum alveg blint í sjóin með þáttinn og vissum ekkert hver eftirspurnin væri fyrir þætti af þessari gerð. Það átti svo eftir að koma í ljós að eftirspurnin er mikil og erum við strax eftir útgáfu á fjórða þættinum komin með á þriðja þúsund hlustanir.
Við vorum fyrst og fremst að hugsa þessa þætti sem skemmtilegt gæluverkefni í tengslum við hlaup sem er okkar ástríða. Við getum talað endalaust um hlaup hvort við annað og hugsuðum þetta sem góðan vettvang til að kynnast betur fólki í íslensku hlauapsenunni, læra af öðrum og miðla okkar reynslu,“ segja Elín Edda og Vilhjálmur í samtali við hlaup.is.
Þau bæta við að íslenska hlaupasamfélagið hafi farið mjög stækkandi undanfarin ár og innan þess hóps sé mjög fjölbreyttur hópur fólks á öllum aldri. „Við viljum nýta það og vonandi getum við með þessum hætti stuðlað að frekari hlaupaiðkun og veitt fólki innblástur til að reima á sig hlaupaskóna og fara af stað!“
Vilja ná til sem flestra með fjölbreyttri umfjöllun
Um efnistök segir hlaupaparið að að allt tengt hlaupum komi til greina. „Hugmyndirnar eru óteljandi og við viljum að þátturinn höfði til sem flestra í hlaupaheiminum. Stundum viljum við fjalla um sértæk málefni í tenglsum við hlaup, svo sem meiðsli, næringu og andlegu hliðina, en viljum einnig heyra einstaklingsmiðaðar sögur frá áhugaverðum einstaklingum, fjalla um einstök hlaup og fyrirmyndir í hlaupaheiminum,“ segja þáttastjórnendur full af metnaði.
Það er ástæða til að fagna því að umfjöllun um hlaup sé kominn á hið vinsæla hlaðvarpsform hér á landi. Nú er bara um að gera að setja í eyrun og byrja að hlusta hvort sem er á hlaupum eða við uppvaskið heima.
Þau Elín Edda og Vilhjálmur hvetja alla til að hlusta og eru einnig opin fyrir tillögum að umfjöllunarefnum. Hugmyndir má senda á hlaupalif@gmail.com eða inn á fésbókarsíðu þáttarins.
Hlaðvarpið má finna á öllum helstu hlaðvarpsveitum. Einnig má hlusta á þættina hér að neðan.