Framfarir, Hollvinafélag millivegalengda og langhlaupara, stendur fyrir fyrirlestri þann 4. apríl nk. þar sem Högni Óskarsson geðlæknir og sérfræðingur í stjórnendaþjálfun fjallar um gildi hlaupa og hreyfingar fyrir almenna heilsu og vellíðan.
Högni er sjálfur vel þekktur fyrir sína ástundun og árangur í hlaupum í gegnum tíðina, en þrátt fyrir að vera kominn yfir sjötugt syndir hann, hjólar eða hleypur flesta daga. Hann hleypur helst styttri vegalengdir í dag en hljóp þó Laugaveginn fyrir fjórum árum, og kláraði Landvætti fyrir þremur árum. Hann hljóp sitt fyrsta maraþonhlaup árið 1975 í Bandaríkjunum og tók þátt í keppnum þar fram til 1980. Hann átti besta íslenska tímann í nokkur ár í heilu maraþoni og þess má geta, að konan hans Ingunn Benediktsdóttir, var fyrsta íslenska konan til að hlaupa heilt maraþon en það var árið 1979.
Í sínum daglegu störfum vinnur Högni mikið með streitu og álagsstjórnun og hefur skipulagt og tekið þátt í fjölda málþinga um geðheilsu, hreyfingu, streitustjórnun og áföll fyrir utan rannsóknir, skrif og erindi um geðraskanir.
Fyrirlesturinn verður í D-sal í húsakynnum ÍSÍ við Engjaveg á 3. hæð og hefst kl. 19:30. Aðgangseyrir er 1.500 kr og rennur til Framfara sem hefur að markmiði að styðja við framfarir í millivegalengdum og langhlaupum á Íslandi.
Allir velkomnir