Það eru samtökin Heimur án stríðs (World without wars; Mundo Sin Guerras), alþjóðleg samtök, sem áttu frumkvæði að þessari göngu en auk þess mun breiðfylking hreyfinga og samtaka, menningarstofnana og einstaklinga standa að framkvæmd hennar víðsvegar um heiminn. Markmið okkar er að skapa vitundarvakningu um allan heim um mikilvægi friðar, sem hafnar öllu ofbeldi hvernig sem það birtist; krefjast kjarnorkuafvopnunar og að stríð verði ekki lengur notuð til að leysa deilur.
Gangan mun hefjast á Nýja-Sjálandi 2. október - á fæðingardegi Gandhi - og mun hún fara um 6 álfur og 90 lönd á þremur mánuðum. Göngunni lýkur 2. janúar 2010 hátt yfir sjávarmáli í Andesfjöllum í Suður Ameríku. Göngunni mun hvarvetna, í þeim borgum sem hún fer um, mæta fjölbreyttar aðgerðir og atburðir að frumkvæði aðila á hverjum stað svo sem hljómleikar, málþing, menningarviðburðir, félagslegar aðgerðir, friðsöm „mótmæli", svo eitthvað sé nefnt. Allt mun þetta beinast að því að vekja athygli á málefnum göngunnar og koma á framfæri því gífurlega magni upplýsinga, þekkingar og reynslu sem hefur safnast um friðarmál og baráttu án ofbeldis.
Varið var einu ári til að rannsaka hvort hægt væri að fara í gönguna áður en tekin var um hana ákvörðun. Síðan sú ákvörðun var tekin í júnímánuði 2008, hefur Heimsgangan fengið fjölda stuðningsyfirlýsinga og fjöldi landa sem taka þátt í henni eykst sífellt (sjá www.heimsganga.is og www.marchamundial.org ).
Sjá nánar um heimsgönguna og yfirlýsingu Frederico Major Zaragoza, fyrrverandi aðal framkvæmdastjóra UNESCO.
Hlaup.is styður Heimsgönguna af heilum hug, því beiting ofbeldis á aldrei rétt á sér. Hvert einasta skref sem tekið er í átt að friðsömum heimi skiptir máli.