Kenýumaðurinn Eliud Kipchoge vann eitt stærsta íþróttaafrek sögunnar í morgun þegar hann hljóp maraþon á undir tveimur tímum, á 1:59:40. Hlaupaáhugamenn þekkja verkefnið Breaking 2 sem hefur vakið athygli undanfarin ár en það snerist um að búa til umgjörð fyrir Eliud til að hlaupa maraþon á undir tveimur tímum. Tilraunin mistókst á kappakstursbrautinni Monza á Ítalíu fyrir tveimur árum, en þá hljóp Kipchoge á 2:00:26.
En Kipchoge náði takmarkinu nokkuð örugglega í dag, hann hélt hraðanum 2:50 á km í gegnum næstum hvern kílómeter á hlaupaleiðinni í Vín í Austurríki. Lokaspretturinn verður lengi í minnum hafður en þá létu hérarnir sig hverfa og Kipchoge tók svakalegan endasprett, skælbrosandi og veifandi til áhorfenda eins og óður maður.
Fagnaði eins og óður maður
Það var virkilega áhrifaríkt að sjá Kipchoge hlaupa lokasprettinn þegar hann gerði sér grein fyrir að takmarkið væri í sjónmáli og ekki síður eftir að hann kom í mark þegar hann hljóp um endamarkið eins og óður maður til að fagna afrekinu.
Tíminn Kenýumannsins fæst hins vegar ekki viðurkenndur sem heimsmet enda ekki um hefðbundið hlaup að ræða. 41 héri, margir af bestu hlaupurum heims skiptust á að halda uppi réttum hraða fyrir Kipchoge og hvetja hann til dáða á leiðinni. Þá keyrði bíll á undan hópnum sem varpaði grænum leysigeysla á jörðina til marks um þann hraða sem þyrfti að halda uppi til að ná undir tveimur tímum.
Tugþúsundir fylgdust með hlaupinu sem fram fór í Vín en Kipchoge hljóp í hring sem var 9,4 km að lengd.
Þess má geta að yfir 500 þúsund manns fylgdust með hlaupinu á Youtube að ótöldum þeim er fylgdust með í sjónvarpi og í gegnum aðrar leiðir.