Þau Arnar Pétursson úr ÍR og María Birkisdóttir úr FH komu fyrst í mark í árlegu Víðavangshlaupi ÍR sem haldið var í 104. sinn í dag. 663 hlauparar voru skráðir til leiks, þar af 589 í fimm km hlaup og 74 í 2,7 km skemmtiskokk að því er segir á heimasíðu ÍR-inga.
Í karlaflokki sigraði Arnar þriðja árið í röð á 15:52 mínútum. Næstu fimm hlauparar í mark voru einnig úr ÍR, þeir Þórólfur Ingi Þórsson, sem sigraði í flokki 40-49 ára karla á 16:16 mínútum, Maxim Sauvageon á 16:25 mínútum, Vignir Már Lýðsson 16:31 mínútum, Vilhjálmur Þór Svansson á 16:42 mínútum og Hlynur Ólason á 17:02 mínútum.
Í kvennaflokki sigraði María Birkisdóttir úr FH á 18 mínútum, á hæla hennar kom Arndís Ýr Hafþórsdóttir úr Fjölni á 18:07 mínútum og ÍR-ingurinn Fríða Rún Þórðardóttir varð þriðja og sigraði jafnframt í aldursflokki 40-49 ára kvenna á 19:07 mínútum. 5 km hlaupið er jafnframt meistaramót Íslands í vegalengdinni.
Heildarúrslit úr hlaupinu munu birtast á hlaup.is um leið og þau berast. Þá mun hlaup.is birta myndaveislu úr hlaupinu innan tíðar. Frábær byrjun á hlaupasumrinu sem á bara eftir að vera betra.