Einar Gunnar Guðmundsson hlaupari og „gagnanörd" eins og hann kallar sig sjálfur, hefur tekið saman ýmsa tölfræði úr Reykjavíkurmaraþonum allt frá árinu 1986. Virkilega gaman er að rýna í tölfræðina sem Einar setur upp á myndrænan og auðskiljanlegan hátt. Hlaup.is fékk leyfi til að birta valda kafla úr vinnu Einars. Fyrir áhugasaman má sjá samantektir Einars í heild sinni á heimasíðu hans Einargunnar.com.
Gríðarleg vinna liggur á bakvið greiningar Einars og skal hann hafa þökk fyrir. Benda má á að Einar byggir vinnu sína að töluverðu leyti á upplýsingum af hlaup.is.
Fjöldi hlaupara á hverju ári
Virkilega athyglisvert er að sjá sprenginguna sem verður í þátttöku í Reykjavíkurmaraþoninu eftir 2004, sérstaklega í 10 km hlaupinu. Árið 2004 eru rúmlega 500 þátttakendur í 10 km hlaupinu, þeir fara upp í um 3000 árið 2007, í rúmlega 6000 árið 2013. En einnig er athyglisvert að sjá töluverða fækkun sem varð á milli 2014 og 2015 sem hefur þó gengið til baka að hluta.
Sömu sögu má segja um hálfmaraþonið þó þróunin þar hafi hafist örlítið fyrir 2004 þegar tæplega 500 tóku þátt. Um 1500 tóku þátt í hálfmaraþoninu 2009 og í sumar voru þátttakendurnir yfir 2500.
Fjöldi maraþonhlaupara í Reykjavíkurmaraþoni lýtur að því er virðist svipuðum lögmálum, ákveðin en stöðug aukning frá 2004 þegar fjöldi þeirra var um 300. Frá 2007 til 2010 er fjöldinn nokkuð stöðugur í um 500 hlaupurum en hefur svo fjölgað töluvert frá 2010 og þátttakendur í sumar voru um 1300.
Greinilegt er að ákveðin bylgja hefst í íslenskri hlaupamenningu um 2004 þegar þátttakendum fer að fjölga svo um munar í Reykjavíkurmaraþoninu, sér í lagi í 10 km hlaupinu.
En vinsældir lengri vegalengda eru einnig að aukast töluvert á tímabilinu og því greinilegt að breiddin hefur aukist mikið íslenskri hlaupamenningu
Fjöldi þátttakenda eftir kyni 10 km
Einar Gunnar skoðaði einnig skiptingu þátttakenda eftir kyni í hverri vegalengd.
Þar má sjá athyglisverða þróun því fram að 2009 er fjöldi kvenna og karla í 10 km hlaupi í Reykjavíkurmaraþoninu tiltölulega jafn. En eftir 2009 hafa konurnar verið töluvert fleiri (þúsund fleiri árið 2014).
Fjöldi þátttakenda eftir kyni 21 km
Karlarnir hafa alltaf verið fjölmennari í hálfu maraþoni en mjög hefur dregið saman með kynjunum allra síðustu ár.
Fjöldi þátttakenda eftir kyni 42 km
Einar Gunnar bendir á þá athyglisverðu staðreynd að konur voru 10% þátttakenda í maraþoni Reykjavíkurmaraþonsins árið 1986 en eru í dag um 33%.
Meðalhraði hlaupara í hverri vegalengd á hverju ári
Þarna má sjá að meðalhraði hlaupara hefur minnkað með árunum. Má það eflaust rekja til þess að sífellt fleiri eru farnir að hlaupa hin síðari ár og það eflaust með minni áherslu á hraða. Fyrstu árin á tímabilinu var einfaldlega mun stærra hlutfall þátttakenda mjög vel þjálfaðir hlauparar. Hin seinni ár hefur hin almenni borgari stóraukið þátttöku sína í Reykjavíkurmaraþoninu. Hinn „almenni borgari" horfir meira í hlaup sem heilsubót, áhugamál og skemmtilega útiveru frekar en róa að því öllum árum að ná sem bestum tíma. Að sjálfsögðu er þessi þróun hið besta mál, að fleiri og fleiri fari út að hlaupa með ólík markmið í huga.
Þrjár myndir sem sýna meðalhraða þátttakenda eftir vegalengdum
Á þessum þremur myndum hér að ofan má sjá glögglega hvernig meðallokatími hefur minnkað í hverri vegalengd fyrir sig.
Nánari tölfræðiupplýsingar má finna á heimasíðu Einars. Hlaup.is stefnir að því að vinna frekar úr upplýsingum sem Einar hefur tekið saman á komandi misserum.