Arnar pósar fyrir ljósmyndara hlaup.is í ReykjavíkurmaraþoninuArnar Pétursson sigraði í maraþoni í Reykjavíkurmaraþoninu á laugardaginn á tímanum 02:28:17. Tími Arnars er besti tími sem Íslendingur hefur náð í maraþoninu og nýtt persónulegt met. Gamla metið átti Sigurður Pétur Sigmundsson.Ansi athyglisverður árangur hjá þessum litríka hlaupara sem hingað til hefur einbeitt sér að styttri vegalengdum.Ólýsanleg tilfinning á endasprettinum„Ég hafði stefnt að þessu hlaupi í allt sumar og ætlaði að vera klár í að hlaupa hratt því vonaðist ég til að eiga möguleika á að vera með fremstu mönnum. Að koma fyrstur í mark var ótrúlega skemmtilegt og í rauninni var ólýsanleg tilfinning að hlaupa niður Lækjargötuna með stútfulla brekku að hvetja mann áfram," sagði Arnar þegar hlaup.is ræddi við hann í dag.
Árangur Arnars er einkar athyglisverður í ljósi þess að hann er þekktari fyrir árangur í styttri vegalengdum. Arnar er þó enginn nýliði þegar kemur að maraþonhlaupum en hann var að klára sitt sjötta maraþon á laugardaginn. „Þetta var sjötta maraþonið sem ég klára, níunda maraþonið sem ég tek þátt í og hef ég lært mikið á hverju hlaupi. Hlaupið á laugardaginn er án efa það hlaup sem mér hefur liðið best í, ég var ótrúlega ánægður með orkustigið. Ég drakk vatn og Powerade á vatnsstöðvunum í hlaupinu. Einnig tókst mér að halda hausnum vel gangandi, ég fór þetta mikið á tilfinningunni, leit bara 5-6 sinnum á Polar úrið en annars var ég bara með augun á veginum."
Næring og útbúnaður fyrir og eftir hlaup eru lykilþættir
Það gefur auga leið að maraþon er ólík áskorun ef miðað er við 5 km eða 10 km hlaup, vegalengdum sem Arnar hefur að miklu leyti einbeitt sér að hingað til. Aðspurður hvaða áskoranir fylgi því fyrir slíkan hlaupara að hlaupa maraþon nefnir Arnar að réttur útbúnaður sé mjög mikilvægur. „Að hlaupa maraþon er ótrúleg áskorun þar sem margir þættir spila inní og maður þarf að passa vel upp á líkamann bæði fyrir, á meðan hlaupinu stendur og eftir hlaup. Þess vegna skiptir næring og útbúnaður miklu máli, ég hljóp á Adidas Adios boost skónum sem fara virkilega vel með lappirnar. Þess utan hef ég verið duglegur að drekka vatn eftir hlaupið og passa að fá nóg af próteini úr íþróttadrykkjum eins og Hleðslu til að hjálpa líkamanum að vinna úr vöðvaniðurbrotinu sem fylgir maraþoni. Einnig hef ég notast við þrýstibúnað frá Compressport til að flýta fyrir endurheimtinni," útskýrir Arnar.
Íslandsmeistari í átta hlaupagreinum - frá 3000m og upp í maraþon
Hlaupasumarið hefur verið Arnari gjöfult og sigrarnir hafa komið í röðum i hinum ýmsu hlaupum og vegalengdum. En er þetta það sem koma skal hjá Arnar, að færa sig í lengri vegalengdir? „Mitt markmið hefur alltaf verið að hlaupa hratt maraþon en ég hef verið í styttri vegalengdunum til þess að byggja upp hraða sem síðan nýtist í maraþoninu. Þetta tímabil hefur gengið ótrúlega vel í rauninni og tókst mér að ná mínu helsta markmiði sem var að verða Íslandsmeistari í átta mismunandi hlaupagreinum eða öllum greinum frá 3000m og upp í maraþonið."
En Arnar er hvergi nærri hættur enda nóg eftir af hlaupaárinu og hyggst til að mynda taka þátt í Fossvogshlaupi Hleðslu strax á fimmtudag. „Framundan í haust eru skemmtileg hlaup eins og Hleðsluhlaupið og svo er ég mjög spenntur fyrir Volcano Trail hlaupinu sem fer fram 16. september. Svo er spurning hvaða vegalengd maður tekur í Hengill Ultra en utanvegahlaupin eru mjög heillandi og eitthvað sem er gott að taka með í hlaupaþjálfunina," segir þessi fjölhæfi hlaupari að lokum.