Compression búnaður er vinsæll á meðal hlaupara.Svokallaðir þrýstingssokkar og legghlífar ("compression" búnaður) hafa notið töluverðra vinsælda hjá hlaupurum á seinni árum. En slíkir aukahlutir hafa ekki jákvæð árhrif á árangur hlaupara ef marka má rannsókn Ohio háskóla í Bandaríkjunum. En aðrar rannsóknir hafa sýnt að slíkir sokkar hafa jákvæð áhrif séu þeir notaðir eftir æfingar og flýta endurheimt.Í rannsókninni voru hlauparar látnir hlaupa á hlaupabretti í 30 mínútur á 80% álagi. Í kjölfarið og fyrir átök voru hlaupararnir rannsakaðir í bak og fyrir, bæði þeir er klæddust þrýstingssokkum og samanburðarhópur.
Hingað til hafa margir talið að titringur við höggið þegar hlaupari stígi í fótinn geti valdið sliti í vöðvum. Hinir sömu hafa sagt að með því minnka þennan titring gætu hlauparar hlaupið lengur og hraðar. Samkvæmt rannsókninni þá minnkar vissulega titringurinn en notkun sokkanna hafði hinsvegar ekki áhrif á frammistöðu hlauparana.
Prófessor við St. Mary háskóla í London, Dr. Jessica Hill segist þess fullviss að þrýstingssokkarnir geri ekki neitt gagn. Sú skoðun sé byggð á fræðilegum rannsóknum. Að þrýstingssokkarnir auki blóðflæði og þar með upptöku súrefnis er eitthvað sem hefur aldrei verið vísindalega sannað að sögn Hill.
En á móti kemur að þrýstingssokkarnir og annar viðlíka búnaður koma að góðum notum eftir æfingar, þeir geta dregið úr bólgumyndun og þar með líkum á meiðslum. Þetta staðhæfir Dr. Florian Engel hjá Heidelberg háskóla í Þýskalandi.
Rannsóknirnar sem vitnað er til hér að ofan eru eflaust ekki hinn stóri sannleikur þegar kemur að "compression" búnaði en hann er þarft innlegg í þá umræðu. Forvitnilegt væri að heyra reynslusögur frá íslenskum hlaupurum sem notast hafa við "copmpression" búnað og hvort þeir telji hann gera gagn. Við hvetjum íslenska hlaupara til að senda okkur línu á heimir@hlaup.is með reynslusögum.
Heimild: The Guardian.