Í tilefni af Hátíðar Hamarskotslækjar, verður Kaldárhlaup haldið sunnudaginn 15. desember n.k. kl. 13:00. Hlaupið er um 10 km skemmtihlaup frá Kaldárseli fyrir ofan Hafnarfjörð og niður í miðbæ Hafnarfjarðar. Hlaupaleiðin er hugsuð sem vatnaleið Hamarskotslækjar frá Kaldárbotnum til sjávar.
Hátíð Hamarskotslækjar var haldin hátíðleg í fyrsta skipti 12. desember 2010 í Hafnarfirði. Hún er haldin til heiðurs Jóhannesi J. Reykdal. Þáttaskil urðu í sögu þjóðarinnar þegar Hamarskotslækur var virkjaður og vatnsaflið nýtt til að knýja trésmíðavélar og raflýsa 16 hús í Hafnarfirði. Fyrir því stóð frumkvöðullinn Jóhannes J. Reykdal sem stofnar árið 1904 fyrstu almenningsrafveitu landsins. Í ár eru 150 ár frá því að Jóhannes Jóhannesson Reykdal fæddist (1874) og 120 ár frá stofnun fyrstu almenningsrafveitu landsins (1904) og Hátíð Hamarskotslækjar er haldin í 10 skipti. Þann 14.12. verður fyrirlestur og kvikmyndasýning um Jóhannes J. Reykdal og ævi hans í Hafnarborg. Hátíð Hamarskotslækjar minnir á mikilvægi lækjarins og ljóssins.
Skráning og skráningargjöld
Skráning fer fram hér á hlaup.is, sjá efst á þessari síðu.
Rútuferð fyrir hlaupara frá Hafnarfjarðarkirkju uppí Kaldársel, styrkt af Hópbílum. Mæting kl.12.00 á bílastæði við Hafnarfjarðarkirkju. Lagt af stað uppí Kaldársel kl.12.30. Hlaupið hefst frá Kaldárseli kl.13.00. Frítt er fyrir hlaupara í sund í Suðurbæjarlaug að hlaupi loknu styrkt af Hafnarfjarðarbæ. Hægt verður að skrá sig á staðnum, en þá er skráningargjaldið 3.000 kr í peningum.
Vegalengd
Hlaupaleiðin er um 10 km.
Hlaupaleiðin
Hlaupið er um 10 km hlaup frá Kaldársseli fyrir ofan Hafnarfjörð og niður í miðbæ Hafnarfjarðar.
Rásmark er rétt fyrir innan lokun vegar við bílastæðin í átt að Kaldárseli. Hlaupið er frá rásmarki í hring að Kaldárseli og síðan Vatnsgirðingu, þaðan yfir gjánna í átt að Hafnarfirði. Hlaupið eftir stígum að Lækjarbotnum og áfram að læknum við leikskólann Hlíðarenda efst í Setbergshverfi, þaðan meðfram Hamarskotslæk eftir göngustígum að Strandgötu, endasprettur eftir Strandgötu. Lokamark við Þórsplan, þar sem Jólaþorpið er. Hægt er að bíða inní Verslunarmiðstöðinni Firði og fá sér Kaldárvatn að drekka við anddyrið sem er næst Jólaþorpinu, þar til verðlaunaafhending á sér stað.
Verðlaun
Kl. 14.00 safnast þátttakendur á svið Jólaþorpsins og verðlaun eru veitt fyrir besta tíma karla og besta tíma kvenna. Grýla velur tíu nöfn úr hópi þátttakenda sem fá verðlaun.
Nánari upplýsingar
Steinunn Guðnadóttir s. 896-4071
Hátíð Hamarskotslækjar hefur verið í samvinnu við Jólaþorpið frá upphafi, Hópbíla, Hafnarfjarðarbæ, Fjarðarfréttir, Hlaup.is og ýmsa gefendur verðlauna í Kaldárhlaupi.