Á Sumardaginn fyrsta, þann 24. apríl næstkomandi, fer Víðavangshlaup ÍR fram. Víðavangshlaupið er eitt vinsælasta og fjölmennasta 5 km keppnishlaupið sem fram fer á Íslandi enda er hlaupið í hjarta Reykjavíkurborgar þar sem hlaupaleiðin liggur um miðbæ hennar. Hlaupið fór fyrst fram árið 1916 og hefur farið fram ætíð síðan og oftast á Sumardaginn fyrsta.
Hið þekkta nafn viðburðarins gefur til kynna að hlaupið sé á víðavangi en svo er ekki lengur en Víðavangshlaup ÍR er eitt af fáum götuhlaupum landsins þar sem götum er lokað og hlauparar og áhorfendur fá tækifæri til að leggja þær óáreittir undir sig.
Samhliða Víðavangshlaupinu fer fram 2,5 km skemmtiskokk án tímatöku, sem hentar vel byrjendum og fjölskyldunni saman, ungum sem öldnum og má segja að fátt eigi eins vel við og að fagna sumarbyrjun með þátttöku í hlaupinu.
Hlaupaleið
Í ár verður boðið uppá nýja hlaupaleið þar sem startið og mark verða í Vonarstræti. Ræst er í Vonarstræti og hlaupið inn á Lækjargötu til hægri, og þaðan til suðurs. Beygt er til hægri yfir Tjarnarbrú og hlaupinn einn hringur umhverfis tjörnina þar til komið er aftur að marksvæðinu, þá beygt inn Lækjargötu til vinstri og hlaupið til norðurs. Beygt er inn Tryggvagötu og hlaupið út á Geirsgötu og beygt til hægri, Geirsgatan er hlaupin aftur út á Lækjargötu. Athugið að aðeins er gert ráð fyrir að loka einni akrein á Geirsgötu fyrir umferð en hlaupið verður stúkað af með keilum og/eða grindum á þessum kafla. Lækjargatan er svo hlaupin til suðurs á vinstri akrein, framhjá Vonarstræti og marksvæðinu, Fríkirkjuvegur og Sóleyjargata á enda þar til tekinn er 180° snúningur á keilu rétt fyrir ofan BSÍ. Þaðan er Fjólugatan hlaupin til baka út að Tjarnarbrú og kláraður annar tjarnarhringur að endamarkinu í Vonarstræti.
Tímasetning
Hlaupið (5 km) er ræst í Vonarstræti Sumardaginn fyrsta, 24. apríl kl. 12:00 en 2,5 km skemmtiskokkið án tímatöku er ræst kl. 12:10 í Lækjargötu. Þátttakendur og áhorfendur eru hvattir til þess að mæta tímanlega á keppnisstað og hafa hugfast að það getur tekið tíma að leggja bílum í miðbæ borgarinnar á þessum degi.
Skráning
Framkvæmd hlaupsins fer fram samkvæmt reglum Frjálsíþróttarsambands Íslands en í því felst að tímar keppenda eru viðurkenndir til skráningar í afrekaskrá. Nánari upplýsingar um hlaupið og skráning.
Verðlaunaafhending
Verðlaunaafhending fer fram við marksvæðið skömmu eftir að fyrstu þrjár konur og þrír karlar eru komin í mark, áætlað um kl. 12:20.