Hlaupasumarið mitt: Gunnar V. Gunnarsson úr Flandra með 46 hlaup á blaði

Gunnar Viðar Gunnarsson, 48 ára húsasmiður úr Hlaupahópnum Flandra er næstur í röðinni til að opinbera hlaupasumarið sitt á hlaup.is. Það var Arnar Karlsson úr Hlaupahópi FH sem skoraði á Gunnar í síðasta pistli.

Byrjaði að hlaupa 43 ára
Gunnar byrjaði að hlaupa reglulega í ársbyrjun 2012. Á þeim tíma vann hann við virkjunarframkvæmdir á Grænlandi og var ekki sáttur við hvernig líkamlegt ástand hans var að þróast. Tilgangurinn með hlaupunum var fyrst og fremst að léttast og bæta heilsuna, en fljótlega var ljóst að hlaupabakterían væri komin til að vera.

Fyrsta maraþon Gunnars var Mývatnsmaraþonið 2013 og þá um haustið lauk Grænlandstímabilinu. Vorið 2014 var Gunnar kominn á fulla ferð með Hlaupahópnum Flandra í Borgarnesi og hefur ekki slegið af síðan ef frá eru taldar frátafir vegna meiðsla. Maraþonin eru orðin sex talsins og þegar þetta er skrifað hefur Gunnar lokið samtals 25 10 km keppnishlaupum á þeim stutta tíma sem liðinn er frá upphafi ferilsins.

Skipuleggur þú jafnan hlaupasumarið þitt með miklum fyrirvara?
Já, ég skipulegg það með góðum fyrirvara. Sum hlaupin eru það langt í burtu að maður þarf að huga að gistingu og öðru skipulagi tímanlega.

Eru einhver sérstök hlaup sem þú sækir í?
Utanvegahlaupin eru skemmtilegust, en ég fer líka í mörg götuhlaup þar sem ég von á skemmtilegri keppni og góðum félagsskap.

Fyrir hvaða hlaupi ertu spenntastur?
Laugavegurinn er númer eitt, alla vega í sumar. Krefjandi og skemmtilegt hlaup!

Ertu fastagestur í mörgum þessara hlaupa?
Ég reyni að mæta á hverju ári t.d. í Víðavangshlaup ÍR, Haust- og Vormaraþonin og Reykjavíkurmaraþon, en reyndar eru ekki svo ýkja mörg ár síðan ég byrjaði að hlaupa.

Markmið fyrir sumarið?
PB í öllum vegalengdum.

Hvern skorar þú á til að opinbera „Hlaupasumarið sitt?
Sonju Sif Jóhannsdóttur í UFA/Eyrarskokki.