Hvernig er staðan á hlaupasumrinu 2020?

uppfært 25. ágúst 2020

Hlaupasamfélagið hefur ekki farið varhluta af því ástandi sem skapast hefur hér á landi og í heiminum öllum undanfarin misseri. Fjölda almenningshlaupa hefur verið aflýst eða frestað undanfarið en þó er gleðilegt að margir hlaupahaldara eru einungis að fresta sínum viðburðum og freista þess að halda þá seinna í sumar.

Langhlaupanefnd FRÍ hefur sent erindi til almannavarna

Fjölmargir hlaupahaldarar hafa haft samband við langhlaupanefnd FRÍ og beðið um aðstoð og ráðgjöf við útfærslu almenningshlaupa. Spurningar og punktar frá hlaupahöldurum hafa verið teknir saman og útfærðir í nokkurs konar „leiðbeiningar um framkvæmd hlaupaviðburða." Þessar leiðbeiningar hafa langhlaupanefnd FRÍ í samstarfi við ÍBR og samtök hjólreiðamanna sent á almannavarnir til yfirferðar. Erindið snýr einna helst að útfærsluatriðum varðandi hlaup t.d. fjölda hlaupara, með hvað hætti er hægt að standa að ræsingu, drykkjarstöðvar, marksvæði og margt fleira. Þess má geta að nálgun FRÍ og samstarfsaðila þeirra er frekar út frá sjónarmiðum um lýðheilsu og almennar heilsubót en grjótharðra keppni ef svo má að orði komast.

Skynsemin í fyrrirúmi

„Ég veit að margir hlauparar hlakka til hlaupasumarsins og eru orðnir keppnisþyrstir , en við þurfum að vanda okkur mjög vel, vera skynsöm og útfæra þessa viðburði með öryggi hlaupara og starfsmanna að leiðarljósi. Nú er bara að bíða og sjá,  en þangað til þá er bara um að gera fyrir alla hlaupara að vera duglegir að æfa," segir Friðleifur Friðleifsson sem á sæti í langhlaupanefnd FRÍ.

Enn eru því ekki öll kurl kominn til grafar og við í hlaupasamfélaginu vonumst að sjálfsögðu til að sem flest hlaup geti farið fram í sumar. Ef marka má fréttaflutning undanfarinna vikna þá gæti brugðið til beggja vona varðandi stærri viðburðifleiri, en þó má alltaf lifa í voninni.

Hlaupahaldarar hér á landi hafa margoft sýnt mikla hugmyndaauðgi í viðburðarhaldi og vel getur farið svo að hægt sé að útfæra almenningshlaup af ýmsu tagi svo mæta megi tilmælum yfirvalda. Í það minnsta hvetur hlaup.is alla hlaupara til að fjölmenna í þau hlaup sem sannarlega fara fram í sumar. Það skyldi þó aldrei fara svo að hlaupasumarið 2020 yrði ár hinna fjölmörgu svokölluðu „minni" almenningshlaupa.

Hér að neðan má sjá yfirlit yfir þá viðburði sem hefur þegar annaðhvort verið frestað eða aflýst.

  • Vormaraþoni Félags maraþonhlaupara -  Aflýst.
  • Hjörleifshöfðahlaupið/Kötlu jarðvangshlaupið 23. apríl - Frestað um óákveðin tíma.
  • Víðavangshlaup ÍR sem átti að fara fram á sumardaginn fyrsta var upphaflega frestað til 4. júní. En nú hefur verið tekin ákvörðun um að fresta hlaupinu fram á haust en á Fesbókarsíðu hlaupsins segir: „ÍR-ingar munu sem endranær kappkosta við að órjúfanleg 105 ára saga hlaupsins haldist með þeirri reisn sem því hæfir. Víðavangshlaup ÍR og þar með Íslandsmeistaramót í 5 km götuhlaupi fer fram þann 17. september nk. með því umfangi sem aðstæður leyfa."
  • Vorhlaupi VMA - Aflýst.
  • 42. Flóahlaupið, 1. maí - Frestað um óákveðin tíma.
  • Neshlaupið, 2. maí - Frestað um óákveðin tíma.
  • Puffin Run (Heimaeyjarhringurinn) 9. Maí - Er á áætlun. Á Fésbókarsíðu hlaupsins segir: „Tímataka er með flögum, þannig að þátttakendur dreifast við ræsingu og ekki hætta á að smitast af Covid 19. Við virðum tveggjametraregluna."
  • Þriðja Bose hlaupi FH sem halda átti 13. maí hefur verið aflýst.
  • Kópavogsmaraþon - Aflýst.
  • Stjörnuhlaupi VHE - Frestað til 12. september.
  • Hvítasunnuhlaupi Hauka 1. júní - Frestað til 11. júlí.
  • Salomon Hengill Ultra 5-6 júní  - Á áætlun.
  • Reykjavíkurmaraþon Íslandsbanka - Á Fésbókarsíðu hlaupsins segir: Í samstarfi við Almannavarnir er unnið hörðum höndum að því að halda Reykjavíkurmaraþonið í sumar. Frekari upplýsinga er að vænta mjög fljótlega.

Þetta eru þau hlaup sem hlaup.is er kunnugt um að hafi verið frestað eða aflýst. Vanti viðburði inn á þennan lista má senda ábendingu á heimir@hlaup.is.