Í mars sagði ég frá liðþófaaðgerð á hné sem ég hafði farið í mánuði áður. Á þeim tímapunkti var ég að gera mér vonir um að vera kominn á fulla ferð 1-2 mánuðum síðar eða um 2-3 mánuðum frá aðgerðinni. Fór m.a. í fjögurra daga golfferð til Englands um miðjan apríl og má í rauninni þakka fyrir að ég eyðilagði ekki batahorfurnar, svo hart gekk ég fram í golfinu. Spilaði 18 holur á fyrsta degi, síðan 27 á öðrum og þriðja degi. Á fjórða degi vaknaði ég loks til raunveruleikans og hætti eftir 9 holur. Þá var ég orðinn ansi kvalinn. Kapp er víst best með forsjá og tók ég frí frá golfinu næstu fjórar vikurnar og kom síðan jafnt og þétt inn í það. Þó svo mér finnist ég orðinn betri en í fyrra þá hef ég ekki náð að lækka forgjöfina, byjaði í 18,1 og fór upp í 18,7 og aftur kominn niður í 18,1. Stend sem sagt í stað, en nokkur punktamót eru framundan til að bæta úr þessu. Sumir segja að golf sé endalaus vandræði sem fari illa með geðslag fólks en þeir sem eru jákvæðari tala um spennandi verkefni sem þurfi að leysa. Hvað sem veldur þá hef ég gaman af þessum leik eins og þúsundir annarra Íslendinga.
Það sem kemur mér á óvart er að ég er búinn að léttast um 5 kg frá því í vetur sem væntanlega er mest golfinu að þakka þar sem ég hef lítið hlaupið. Frá því í maí hef ég haldið mig við að hlaupa tvisvar í viku þó svo batinn hafi loks orðið hraðari frá lok júní. Hef meira að segja tekið léttan fartleik með brekkusprettum í Heiðmörkinni annað slagið undanfarnar vikur. Skrítið þó að enn þarf ég að finna rétta beitingu á vinstri fætinum í upphafi æfingar, getur tekið um 2 km þar til ég næ að hlaupa eðlilega. Sennilega sambland af styrkleysi og óöryggi. Í heildina virðist ég vera heppinn, kominn ágætlega í gang um hálfu ári eftir aðgerð, en margir hafa þurft mun lengri tíma, jafnvel 2-3 ár. Í öllu má finna eitthvað jákvætt, en ég er nú ákveðnari en í mörg undanfarin ár að æfa skipulega og markvisst í allan næsta vetur. Stefni að því að byrja þegar í styrktaræfingum í október og hlaupa reglulega með. Svo er það spurningin hvort þetta skili sér í lækkaðri forgjöf á næsta ári.