Á hlaupum fyrir viku ræddum við Jói Kristjáns um orkubitagerð. Taldi Jói einboðið að efna til námskeiðs. Ég heyrði líka á sumum í hópnum að þeir væru miskátir með gelbréfin sín, því gel fer misjafnlega í maga. Því verður hér kynnt upphaflega uppskriftin sem Gunnlaugur hafði eftir Löbar Larsson, sænskum langhundi.



Uppskriftin:

3 dl rjómi, 3 dl sýróp, 3 dl sykur.

Þetta er soðið við vægan hita í potti í 30 mínútur til að búa til sýrópslellu. Hræra skal öðru hverju. Suðutími um 20 mín við vægan hita.

Á meðan eru 21 dl af Bónusmúslí sett í skál. Ekki sakar að strá salti yfir eftir smekk, ef mönnum hættir til að missa mikið salt á hlaupum. Bökunarplata tekin til og smjörpappír settur á hana.

Nú er sýrópslellunni hellt yfir múslið og hrært vel. Mótaðar eru lengjur og lagðar á smjörpappírinn og hnuðlaðar vel með hnefum til að þjappa þær. Þetta er látið kólna, skorið í hæfilega bita og geymt í frystinum. Svo er tilvalið að pakka bitum í álpappír, setja í drykkjarbelti og muðla á leiðinni.



Kostnaður við þessa uppskrift er um 600 krónur. Úr henni fást um 50 myndarlegir bitar. Miðað við að orkustöng í búð kostar 220 krónur, þá er sparnaðurinn augljós.



Dagur Egonsson lagði þessa viðbót til:

“Eðal orkubitar. Fannst uppskriftin full stór þannig að ég helmingaði hana. 1 1/2 dl. sýróp, mjólk, sykur + 7 dl. harðmeti.



Lagfærði uppskriftina aðeins, notaði sojamjólk í stað rjóma, hrásykur fyrir sykur og agave síróp frá Himnesk Hollusta (Sollu) sem síróp. Einnig notaði ég Granóla múslí og blandaði með 1/3 salthnetum. Þegar ég var búinn að þjappa smurði ég yfir með 100 gr. af 70% súkkulaði."



Við þetta má bæta að síðast þegar ég lagaði mér bita, setti ég nokkra bita af 70% súkkulaði út í lelluna og saxaði slatta af döðlum með múslinu. 



Þeir sem hafa áhuga á námskeiði, mega gjarna senda mér tölvupóst. gisli@internet.is.

Einnig eru fleiri útfærslur á uppskriftinni vel þegnar. Í vaxandi dýrtíð er þetta auðvitað mikill sparnaður.

Þessir bitar svínvirka.



Var einmitt að malla einn skammt í gærkveldi fyrir Hvannadalshnjúk um helgina.  Breytti aðeins til og notaði haframjöl (2dl) og döðlur (1,5dl) sem hluta af harðmetinu til að gera blönduna mýkri undir tönn.

Athugið einnig að helmingsuppskriftin á að vera með 10 1/2 dl. harðmeti ekki 7 dl., með 7 dl. verður blandan alltof hörð.